အန်းဒရစ်ခ် ကတော့ ၂၀၂၅-၂၆ ရာသီမှာ လိုင်ယွန်ဆီ အငှားနဲ့ သွားရောက် ကစားရင်း ခြေစွမ်းကောင်းတွေ ပြန်လည် ရှာဖွေ တွေ့ရှိခဲ့သူ ဖြစ်ပါတယ်။ ဒါပေမယ့် သူ့ရဲ့ စံပြပုဂ္ဂိုလ်လိုမျိုး လာလီဂါ ထိပ်သီး ကလပ် ရီးရဲလ်မက်ဒရစ် မှာပဲ နာမည်တစ်လုံး စိုက်ထူနိုင်ဖို့ သန္နိဌာန်ချထားပါတယ်။
လူငယ်ကြယ်ပွင့် အန်းဒရစ်ခ်က ကစားသမား ဘဝမှာ အခက်အခဲတွေနဲ့ ကြုံတွေ့ရမှာက “ ဘောလုံးလောကရဲ့ နိယာမ” တစ်ခုပဲလို့ ယုံကြည်ထားပေမယ့်၊ သူ့ရဲ့ စံပြ ဖြစ်သူ ခရစ္စတီယာနို ရော်နယ်ဒို လိုမျိုး အခက်အခဲမှန်သမျှကို ကျော်ဖြတ်နိုင်ဖို့ စိတ်ပိုင်းဖြတ်ထားတာပါ။ ဒီရာသီ အစောပိုင်းမှာတုန်းက ရီးရဲလ်မက်ဒရစ် အသင်းရဲ့ နည်းပြ ဇာဘီ အလွန်ဆိုရဲ့ လက်အောက်မှာ ပွဲထွက်ခွင့် ရဖို့ ရုန်းကန်ခဲ့ရပြီးနောက် အန်းဒရစ်ခ်ဟာ ၂၀၂၅-၂၆ ရာသီရဲ့ ဒုတိယ ရာသီဝက် အတွက် လိုင်ယွန် အသင်းဆီ အငှားထွက် ကစားခဲ့ရပါတယ်။
အသက် ၁၉ နှစ် အရွယ် ရှိပြီ ဖြစ်တဲ့ ဒီဘရာဇီးလ် တိုက်စစ်မှူးဟာ လိုင်ယွန် အသင်း အတွက် ပြိုင်ပွဲစုံ ၂၁ ပွဲ ကစားပေးခဲ့ရာမှာ ၈ ဂိုး သွင်း၊ ၈ ဂိုး ဖန်တီးပေးနိုင်ခဲ့ပြီး အသင်းကို လီဂူးဝမ်းမှာ အဆင့် ၄ နဲ့ ရာသီသိမ်းနိုင်အောင် ကူညီပေးခဲ့ပါတယ်။ သူ လိုင်ယွန် အသင်း အတွက် ပထမဆုံးပွဲ စတင်ကစားပေးခဲ့တဲ့ အချိန်က စလို့ တွက်ချက်မယ် ဆိုရင် ပြိုင်ပွဲစုံမှာ လီဂူးဝမ်း ကစားသမားတွေထဲ ၆ ယောက်မြောက် ဂိုးပါဝင် ပတ်သက်မှု အများဆုံး ကစားသမားလည်း ဖြစ်ခဲ့ပါတယ်။
လိုင်ယွန် အသင်း ဘက်ကတော့ ဒီဘရာဇီးလ် လက်ရွေးစင်ကို နောက်ထပ် တစ်ရာသီ အငှားစာချုပ်နဲ့ ထပ်မံ ခေါ်ယူဖို့ စိတ်ဝင်စားနေပါတယ်။ ဒါပေမယ့် အန်းဒရစ်ခ် ကတော့ လာလီဂါ ထိပ်သီး အသင်းရဲ့ ပွဲထွက်လူစာရင်းမှာ နေရာရဖို့ ကိုပဲ အပြည့်အဝ အာရုံစိုက်နေပုံ ရပါတယ်။
အန်းဒရစ်ခ်ဟာ ကြိုးစား အားထုတ်မှုနဲ့ ပါရမီပိုင်းမှာ စံပြ ဖြစ်တဲ့ မက်ဒရစ် ဂန္ထဝင် ရော်နယ်ဒိုရဲ့ ခြေရာကို နင်းနိုင်ဖို့ မျှော်မှန်းနေတာပါ။ “အခြေအနေတွေက ခက်ခဲလိမ့်မယ်၊ အမြဲတမ်းလည်း ခက်ခဲနေမှာပဲ။ ဒါက ဘောလုံးလောကရဲ့ နိယာမပါပဲ။ ငယ်ငယ်ရွယ်ရွယ်နဲ့ ပြင်းပြင်းထန်ထန် ကြိုးစားချင်စိတ် ရှိတာက ကျွန်တော်နဲ့ ခရစ္စတီယာနို ရော်နယ်ဒို ကြားထဲက တူညီတဲ့ အချက်တစ်ခုပေါ့။ ဒါပေမယ့် ကျွန်တော်က သူ့ကို ကြိုးစားအားထုတ်မှု တစ်ခုတည်းကြောင့်တင် အထင်ကြီး အားကျတာ မဟုတ်ပါဘူး။”
“သူက အံ့မခန်း ပါရမီရှင် ဖြစ်သလို၊ ငယ်စဉ်ဘဝတုန်းက အခက်အခဲ အကျပ်အတည်းတွေကို ကျော်ဖြတ်ခဲ့ရတဲ့ သူ့ရဲ့ဇာတ်လမ်းကလည်း တကယ့်ကို စိတ်ဓာတ်ခွန်အား ရစရာပါ။” လို့ အန်းဒရစ်ခ်က GQ Brazil နဲ့ အင်တာဗျူးမှာ ပြောကြားခဲ့ပါတယ်။
“အကယ်၍ ခင်ဗျားက ရာသီဝက် အလယ်ကို ရောက်နေပြီဆိုရင် မိမိကိုယ်ကိုယ် နောက်ပြန်ဆွဲစေမယ့် အရာတွေကို လုပ်လို့ မရတော့ပါဘူး။ အခြေအနေတွေက ခက်ခဲလိမ့်မယ်၊ အမြဲတမ်းလည်း ခက်ခဲနေမှာပဲ။ ဒါက ဘောလုံးလောကရဲ့ နိယာမပါပဲ။” လို့ ၎င်းက ဖြည့်စွက် ပြောကြားခဲ့ပါတယ်။
လက်ရှိမှာ လာလီဂါ ကလပ် ရီးရဲလ်မက်ဒရစ်ကို နည်းပြဟောင်း ဟိုဆေး မော်ရင်ညိုကို ပြန်လည် ခေါ်ယူထားပြီး အသင်းကို အဆင့် မြှင့်တင်မှု များစွာ ပြုလုပ်ဖို့ ရှိနေပါတယ်။ ဥက္ကဌ ဖလော်ရန်တီနို ပီရက်ဇ် ကိုယ်တိုင် ကလည်း ငွေကြေး အလုံးအရင်း ထုတ်ပေးပြီး ဂလက်တီကို အသင်း အဖြစ် ပြန်လည် တည်ဆောက်ဖို့ ရည်မှန်းထားပါတယ်။ ထိပ်တန်း ကစားသမား အများအပြားလည်း ခေါ်ယူဖို့ ရှိနေတာကြောင့် အန်းဒရစ်ခ် အနေနဲ့ သူဖြစ်တဲ့ အတိုင်း ဖြစ်ခွင့်ရဖို့ အခွင့်အရေး ရနိုင်ပါ့မလား ဆိုတာ စောင့်ကြည့်ရတော့မှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
