ကတ်တာလိုးနီယားမြေမှာ တစ်ရာသီပဲ ကစားခဲ့ပေမယ့် မားကပ်စ် ရက်ရှ်ဖို့ဒ်ဟာ လာလီဂါ ကလပ် ဘာစီလိုနာ အတွက် သွင်းဂိုးနဲ့ ဖန်တီးမှု စုစုပေါင်း ၂၈ ကြိမ် အထိ ပါဝင်ကူညီပေးခဲ့ပါတယ်။
အခုဆိုရင်တော့ ဘာစီလိုနာမှာ ရက်ရှ်ဖို့ဒ်ရဲ့ ခေတ်တစ်ခေတ်ဟာ တရားဝင် ကုန်ဆုံးသွားခဲ့ပါပြီ။ အင်္ဂလန် လက်ရွေးစင် တိုက်စစ်မှူးဟာ ဆိုရှယ်မီဒီယာပေါ်မှာ လှိုက်လှိုက်လှဲလှဲ နှုတ်ဆက်စာ ရေးသားကာ ဘာစီလိုနာမှာ သူ့ရဲ့ အချိန်တွေ ပြီးဆုံးသွားပြီ ဖြစ်ကြောင်း အတည်ပြုခဲ့သလို ကတ်တာလန် ကလပ် ဘက်ကလည်း ပြန်လည် နှုတ်ဆက်ခဲ့ပါတယ်။
၂၀၂၅-၂၆ ရာသီ အငှားစာချုပ် ကုန်ဆုံးပြီးနောက် ဘာစီလိုနာနဲ့ ရက်ရှ်ဖို့ဒ်တို့ အကြား ဆက်လက် လက်တွဲချင်တဲ့ ဆန္ဒ နှစ်ဖက်စလုံးမှာ ရှိခဲ့ကြပေမယ့် အန်သိုနီ ဂေါ်ဒွန်နဲ့ ကာရင်မ် အဒီယီမီ တို့လို တောင်ပံ ကစားသမားတွေကို ခေါ်ယူလိုက်တာကြောင့် ရက်ရှ်ဖို့ဒ် ဘာစီလိုနာကို အပြီးသတ် ပြောင်းရွှေ့မယ့် မျှော်လင့်ချက် အပြီးတိုင် ချုပ်ငြိမ်းသွားခဲ့ရတာပါ။
“ဒီမှာ ရှိစဉ် အတွင်း ကျွန်တော့်ရဲ့ အချိန်တွေကို ကောင်းမွန်ပြီး အမှတ်တရ ဖြစ်စရာ အတွေ့အကြုံတွေ ဖြစ်အောင် ဖန်တီးပေးခဲ့ကြတဲ့ ကလပ် အသင်းက လူတိုင်းကို အထူးပဲ ကျေးဇူးတင်ပါတယ်။ စက္ကန့်တိုင်းကို ပျော်ပျော်ရွှင်ရွှင် ဖြတ်သန်းခဲ့ရသလို အထူးခြားဆုံး အမှတ်တရများစွာ ကိုလည်း ရင်ဝယ် ပိုက်ထွေးသွားမှာပါ။”
“လာမယ့် ရာသီမှာ အသင်းနဲ့ ပရိသတ်တွေ အားလုံး ကံကောင်းခြင်းတွေနဲ့ အတူ အောင်မြင်မှုပေါင်း များစွာ ရရှိပါစေလို့ ဆုတောင်းပေးပါတယ်။ Visca el Barça (ဘာဆာ အောင်မြင်ပါစေ)” လို့ ရက်ရှ်ဖို့ဒ်က Instagram မှာ ရေးသား နှုတ်ဆက်ခဲ့ပါတယ်။
ဂါဗီ၊ ဖာမင်း လိုပက်ဇ်၊ ရာဖင်ညာ၊ ပါအူ ကူဘာဆီ၊ ဒန်နီ အော်လမိုနဲ့ ဖာရန်း တောရက်စ် တို့လို ဘာစီလိုနာ ကစားသမား အများအပြားဟာ ဒီပိုစ့်အောက်မှာ ဝင်ရောက် ကွန်မန့်ပေးကာ နှုတ်ဆက်ခဲ့ကြပြီး ဆုမွန်ကောင်း တောင်းပေးခဲ့ကြပါတယ်။ အလားတူ ဘာစီလိုနာရဲ့ တရားဝင် အကောင့် ကနေလည်း ထွက်ခွာသွားတဲ့ တိုက်စစ်မှူး အတွက် လှိုက်လှိုက်လှဲလှဲ တုံ့ပြန်စကားပါးခဲ့ပါတယ်။
“အရာ အားလုံး အတွက် ကျေးဇူးပါ ရက်ရှီ။ မင်းဟာ ငါတို့ရဲ့ အစိတ်အပိုင်း တစ်ခု အဖြစ် အမြဲတမ်း တည်ရှိနေမှာပါ” လို့ ဘာစီလိုနာက ရေးသားခဲ့ပြီး အသက် ၂၈ နှစ် အရွယ် တိုက်စစ်မှူး ကလည်း “ဒီကောင်လေးတွေကို အားပေးဖို့ တစ်နေ့နေ့မှာ ကျွန်တော် ပြန်လာခဲ့ပါမယ်” လို့ ပြန်လည် တုံ့ပြန်ခဲ့ပါတယ်။
မားကပ်စ် ရက်ရှ်ဖို့ဒ် ကို အသင်းအနေနဲ့ “လွမ်းဆွတ်နေမှာပါ” လို့ ဝန်ခံလိုက်တဲ့ ဟန်ဆီ ဖလစ်ခ်
လက်ရှိ ယူကေမြေမှာ ရာသီကြို လေ့ကျင့်ခန်းတွေ ဆင်းနေပြီး ကမ္ဘာ့ဖလား ပြိုင်ပွဲ အပြီး အနားယူနေရဆဲ ကစားသမား အများအပြား မပါဝင်နိုင်သေးတဲ့ ဘာစီလိုနာ အတွက်တော့ ရက်ရှ်ဖို့ဒ် မရှိတဲ့ နေ့စဉ်ဘဝက စတင်နေပြီ ဖြစ်ပါတယ်။ ဟန်ဆီ ဖလစ်ခ်ရဲ့ အသင်းဟာ ဗြိတိန် ခရီးစဉ် ပထမဆုံးပွဲ အဖြစ် ဘာမင်ဂမ်စီးတီးနဲ့ ၂-၂ ဂိုးစီ သရေကျခဲ့ပြီး ပင်နယ်တီမှာ ရှုံးနိမ့်ခဲ့ပါတယ်။
ပွဲအပြီးမှာ ဖလစ်ခ်ဟာ အကြောင်းအရာ အများအပြားကို ထုတ်ဖော် ပြောဆိုခဲ့ပြီး ရက်ရှ်ဖို့ဒ် ထွက်ခွာသွားတာနဲ့ ပတ်သက်လို့လည်း ပွင့်ပွင့်လင်းလင်း ပြောကြားခဲ့ပါတယ်။
“မားကပ်စ်နဲ့ ပတ်သက်ပြီး ကျွန်တော် ပြောနိုင်တာ ကတော့ သူနဲ့ လက်တွဲ လုပ်ကိုင်ရတာကို အင်မတန် သဘောကျပါတယ်။ တစ်ခါတလေကျရင် အငှားနဲ့ လာကစားတဲ့ ကစားသမားတွေနဲ့ ပတ်သက်လို့ ဘာဖြစ်လာမလဲဆိုတာ မသိနိုင်ပါဘူး။ ကျွန်တော် တို့ရဲ့ အခြေအနေ ကလည်း ဒါမျိုး အတွက် သိပ်မလွယ်ကူတာ အမှန်ပါပဲ၊ ဒါပေမယ့် သူ့နဲ့ လက်တွဲရတာ အတော်လေး ဝမ်းသာမိပါတယ်။ သူဟာ အံ့ဩစရာကောင်းတဲ့ ကစားသမား တစ်ယောက် ဖြစ်သလို စရိုက်ကောင်းတဲ့ လူတစ်ယောက်လည်း ဖြစ်ပါတယ်။ အသင်းရော ကျွန်တော်ပါ သူ့ကို လွမ်းဆွတ်နေမှာပါ၊ ဒါပေမယ့် ဒါဟာ ဘောလုံးလောကရဲ့ သဘောတရားမို့ လက်ခံရမှာပါပဲ။” လို့ ဖလစ်ခ်က ပြောပါတယ်။
ရက်ရှ်ဖို့ဒ်ရဲ့ ဘာဆာမှာ တစ်ရာသီတာ ဖြတ်သန်းမှုဟာ ပြိုင်ပွဲစုံ ၄၉ ပွဲမှာ ၁၄ ဂိုး သွင်း၊ ၁၄ ဂိုး ဖန်တီးပေးနိုင်ခဲ့ပြီး စပိန် စူပါဖလားနဲ့ လာလီဂါ ဖလား တို့ကို အရယူနိုင်ခဲ့ပါတယ်။ အခုတော့ ရက်ရှ်ဖို့ဒ်ဟာ သူ့ရဲ့ ငယ်ဘဝကလပ် မန်ချက်စတာယူနိုက်တက်ဆီ ပြန်လည် ရောက်ရှိခဲ့ပြီး ဒုတိယမြောက် စာမျက်နှာသစ်ကို စတင်တော့မှာ ဖြစ်ပါတယ်။ တစ်ဖက် မှာလည်း ဘာစီလိုနာဟာ ရက်ရှ်ဖို့ဒ် ချန်ထားခဲ့တဲ့ ဟာကွက်ကို ဖြည့်ဆည်းဖို့ ကစားသမားသစ်တွေကို ဆက်လက် ခေါ်ယူနေပါတယ်။
ဘယ်လ်ဂျီယံ လူငယ်ကြယ်ပွင့်ကို စာချုပ်လိုက်ကြောင်း ဘာစီလိုနာ အတည်ပြု
ဘာစီလိုနာ အသင်းဟာ ကလပ် ဘရုဂေးက အသက် ၁၈ နှစ် အရွယ် ဘယ်လ်ဂျီယံ တောင်ပံ ကစားသမား ဂျက်ဆီ ဘီဆီဝူကို ၂၀၃၁ အထိ သက်တမ်းရှိမယ့် စာချုပ်နဲ့ ခေါ်ယူလိုက်ကြောင်း ထုတ်ပြန်ခဲ့ပါတယ်။ ဒါဟာ အဒီယီမီနဲ့ ဂေါ်ဒွန်တို့ ပြီးရင် လာလီဂါ ကလပ်က ဒီနွေရာသီရဲ့ တတိယမြောက် တောင်ပံ တိုက်စစ် ကစားသမား ခေါ်ယူမှု ဖြစ်ပါတယ်။
ဘီဆီဝူဟာ ဘယ်လ်ဂျီယံ လူငယ်အသင်းတွေရဲ့ ပုံမှန် ပွဲထွက် ကစားသမား တစ်ယောက် ဖြစ်ပြီး ပြီးခဲ့တဲ့ အောက်တိုဘာလက ကစားခဲ့တဲ့ ၂၀၂၅ ယူ ၁၇ ကမ္ဘာ့ဖလား ပြိုင်ပွဲရဲ့ အကောင်းဆုံး ၁၁ ယောက် စာရင်း မှာလည်း ပါဝင်ခဲ့သူပါ။ ဘရုဂေး စီနီယာ အသင်းမှာ ပွဲထွက်ခွင့် မရသေးပေမယ့် ပြီးခဲ့တဲ့ ရာသီ UEFA Youth League ဗိုလ်လုပွဲ အထိ တက်လှမ်းခဲ့တဲ့ ကလပ်ရဲ့ ယူ ၁၉ အသင်းမှာ အရေးပါတဲ့ ကစားသမား ဖြစ်ခဲ့ပါတယ်။
ESPN ရဲ့ ဖော်ပြချက်အရ ကာတာလန် ကလပ်ဟာ ဒီလူငယ်လေး အတွက် ယူရို ၈.၅ သန်း အသုံးပြုခဲ့ပြီး ဘရုဂေးက နောင်တစ်ချိန် ပြန်လည် ရောင်းချရငွေရဲ့ ၂၀ ရာခိုင်နှုန်း ရရှိမယ့် အချက် ကိုပါ ထည့်သွင်းထားပါတယ်။ ဘီဆီဝူဟာ ပထမအသင်းကြီး အတွက် ခေါ်ယူမှု ဖြစ်ပြီး ဖလစ်ခ်ရဲ့ လက်အောက်မှာ လေ့ကျင့်နိုင်ဖို့ ရာသီကြို ခရီးစဉ်မှာ ပါဝင်သွားမှာပါ။ ဒါပေမယ့် တောင်ပံ နေရာမှာ လူအင်အား တောင့်တင်းနေတာကြောင့် ၂၀၂၆-၂၇ ရာသီ ပွဲချိန်အများစုကို ဘာဆာ B အသင်းမှာပဲ ကစားရဖွယ် ရှိပါတယ်။
ဘာစီလိုနာရဲ့ နွေရာသီ တိုက်စစ်ပိုင်း ပြန်လည် တည်ဆောက်မှုတွေ ဆက်လက် ရှိနေပေမယ့် ရောဘတ် လီဝမ်ဒေါစကီးရဲ့ နေရာမှာ အစားထိုးဖို့ ထိပ်တန်း တိုက်စစ်မှူး စစ်စစ် တစ်ယောက် ကိုတော့ မခေါ်ယူနိုင်သေးပါဘူး။ နွေရာသီ အပြောင်းအရွှေ့ ဈေးကွက် ပိတ်ဖို့ အချိန် နည်းလာတာကြောင့် ဒါဟာ သူတို့ရဲ့ အဓိက အလုပ် တစ်ခု ဖြစ်လာနေပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
