ကိုးလ် ပါးလ်မား ကတော့ လက်ရှိမှာ ပရီးမီးယားလိဂ် ပြိုင်ဘက် မန်ချက်စတာယူနိုက်တက် အသင်းထံ အံ့အားသင့်ဖွယ် ပြောင်းရွှေ့တော့မယ်လို့ သတင်းတွေ ထွက်ပေါ်နေပါတယ်။ ဒီသတင်းတွေနဲ့ ပတ်သတ်လို့ ချဲလ်ဆီး နည်းပြ လီယမ် ရိုစီနီယာ ကတော့ လက်တွေ့မကျတဲ့ သတင်းတွေ အပေါ် ဆွေးနွေးဖို့တောင် အကြောင်း မရှိကြောင်း အခိုင်အမာ ပြောကြားခဲ့ပါတယ်။
အင်္ဂလန် ကြယ်ပွင့်ဟာ နာပိုလီနဲ့ ရင်ဆိုင်ရမယ့် ချန်ပီယံလိဂ် ပွဲစဉ် အတွက် နေပဲလ်ကို အသင်းနဲ့ အတူ လိုက်ပါသွားခဲ့ပေမယ့်လည်း ၎င်းအသင်းပြောင်းတော့မယ် ဆိုတဲ့ သတင်းတွေ ကတော့ ဆက်လက် ထွက်ပေါ်နေဆဲ ဖြစ်ပါတယ်။ နာပိုလီနဲ့ ချန်ပီယံလိဂ် ပွဲစဉ် မတိုင်ခင်မှာ ပါးလ်မားက စတန်းဖို့ဒ်ဘရစ်ချ်မှာ မပျော်မရွှင် ဖြစ်နေပြီး အသင်းပြောင်းဖို့ ဆန္ဒရှိနေတယ် ဆိုတဲ့ သတင်းတွေက အကျယ်လောင်ဆုံး ထွက်ပေါ်နေတာပါ။ ပါးလ်မားက ငယ်စဉ်က မန်ချက်စတာယူနိုက်တက်ကို အားပေးခဲ့သူ တစ်ဦး ဖြစ်တာကြောင့် ၎င်း ပြောင်းရွှေ့မယ့် နေရာက အိုးထရက်ဖို့ဒ် ဖြစ်နိုင်ကြောင်း သတင်းတွေက ဖော်ပြနေတာ ဖြစ်ပါတယ်။
ဒါကြောင့် လီယမ် ရိုစီနီယာက “ဒီကိစ္စ အတွက် အထူးတလည် အာမခံချက်ပေးနေဖို့ မလိုပါဘူး။ ဒါဟာ တကယ့်ကို လက်တွေ့မကျတဲ့ ကိစ္စပါ။ ဘယ်ကနေ ဒီသတင်းတွေ ထွက်လာမှန်းလည်း မသိသလို ဘာအခြေအမြစ်မှလည်း မရှိပါဘူး။ ဒီအကြောင်းကို ဆွေးနွေးနေဖို့တောင် အကြောင်း မရှိတာ ကျွန်တော့်ရဲ့ ရပ်တည်ချက်ပါပဲ။”
“ကိုးလ် (ပါးလ်မား)က ဒီမှာ အရမ်းပျော်နေပါတယ်။ ကျွန်တော် သူ့ကို အကြိမ်ကြိမ် စကားပြောဖူးတယ်။ ကျွန်တော်တို့ရဲ့ စဉ်းစားချက်တွေက ဒီအသင်းကို ဘယ်လို ပိုကောင်းအောင် လုပ်မလဲ၊ သူ ဘယ်လို တိုးတက်လာမလဲနဲ့ ကျွန်တော်က သူ့ကို ဘယ်လိုကူညီပေးနိုင်မလဲ ဆိုတာတွေပဲ ဖြစ်ပါတယ်။ သူ ဒီမှာရှိရတာကို မြတ်နိုးသလို ချဲလ်ဆီး ကစားသမား အဖြစ်ပဲ ဆက်ရှိနေချင်တာပါ။ ကောလာဟလတွေ ကိုတော့ တားဆီးလို့ မရပေမယ့် တချို့သတင်းတွေက အမှန်တရားနဲ့ အရမ်းဝေးကွာလွန်းနေပါတယ်။” လို့ ရိုစီနီယာက ပြောကြားခဲ့ပါတယ်။
၂၀၂၄-၂၀၂၅ ဘောလုံး ရာသီက ပရီးမီးယားလိဂ် အပါအဝင် ပြိုင်ပွဲစုံ ၄၆ ပွဲတွင် ၂၆ ဂိုး အထိ ပါဝင် ပတ်သက်ခဲ့တဲ့ ပါးလ်မားက ဒီရာသီ မှာတော့ ဒဏ်ရာ ပြဿနာတွေနဲ့ ရုန်းကန်နေရပါတယ်။ ပါးလ်မားက ဒီရာသီ ပြိုင်ပွဲစုံမှာ ချဲလ်ဆီး အတွက် ၁၉ ပွဲသာ ကစားထားနိုင်ကာ ၈ ဂိုး သွင်း၊ ၂ ဂိုး ဖန်တီးပေးပါတယ်။ ဒါ့အပြင် ပါးလ်မားဟာ အခုလို ရုန်းကန်နေရမှုကြောင့် ဒီရာသီ အတွက် တန်ဖိုး အကြီးဆုံး ကစားသမား ၁၀ ဦး စာရင်းမှာတောင် ပါဝင်တော့ခြင်း မရှိပါဘူး။
ပါးလ်မားက ပြီးခဲ့တဲ့ ခရစ္စတယ်ပဲလေ့စ်ကို ၃-၁ နဲ့ အနိုင်ရတဲ့ ပရီးမီးယားလိဂ် ပွဲစဉ်မှာ မပါဝင်နိုင်ခဲ့ပေမယ့်လည်း အီတလီ ခရီးစဉ် ကိုတော့ အသင်းနဲ့ အတူ လိုက်ပါသွားပြီ ဖြစ်ပါတယ်။ နည်းပြ ရိုစီနီယာ အနေနဲ့လည်း ချဲလ်ဆီးမှာ သူ့ရဲ့ ကောင်းမွန်သော စတင်မှုကို ဆက်လက် ထိန်းသိမ်းလိုနေပါတယ်။
ရိုစီနီယာ လက်ထက် ပထမဆုံး ဥရောပ ပွဲစဉ် ဖြစ်တဲ့ ပါဖို့စ်နဲ့ ပွဲမှာ ချဲလ်ဆီးက ပေးပို့မှု တိကျမှု (Pass Completion) ၉၄.၅ ရာခိုင်နှုန်း အထိ ရှိခဲ့ပြီး ဒီရာသီ ချန်ပီယံလိဂ်မှာ အမြင့်ဆုံး အဖြစ် စံချိန်တင်နိုင်ခဲ့ပါတယ်။ အန်ဇို မာရက်စ်ကာရဲ့ နေရာမှာ အစားဝင်လာတဲ့ ရိုစီနီယာက သူ ချဲလ်ဆီးကို ကိုင်တွယ်ခဲ့တဲ့ ၅ ပွဲမှာ ၄ ပွဲအထိ အနိုင်ရရှိထားပေမယ့်လည်း ကစားသမား တချို့ရဲ့ အနာဂတ်နဲ့ ပတ်သက်လို့တော့ မေးခွန်းထုတ်စရာတွေ ရှိနေဆဲ ဖြစ်ပါတယ်။
ရိုစီနီယာက “အခုလို သတင်းတွေ ထွက်လာတဲ့ အချိန် ကိုတော့ ကျွန်တော် မအံ့သြပါဘူး။ နည်းပြသစ် တစ်ယောက် ရောက်လာတဲ့အခါ လူတွေက ကစားသမားတွေ စိတ်မငြိမ်မသက် ဖြစ်နေတယ်လို့ ထင်တတ်ကြတယ်။ ဒါပေမဲ့ ဒါက မဟုတ်ပါဘူး။ ကိုးလ်က ဒီမှာ ရှိနေသလို အရမ်းလည်း ပျော်နေပါတယ်။ သူ ကွင်းထဲကို ပြန်ဝင်လာတာကို မြင်ဖို့ ကျွန်တော် မစောင့်နိုင်တော့ပါဘူး။” လို့ ထပ်လောင်း ပြောကြားခဲ့သည်။
ချဲလ်ဆီးနဲ့ ရင်ဆိုင်ရမယ့် နာပိုလီ ကတော့ အသင်း ၃၆ သင်း ပါဝင်တဲ့ အမှတ်ပေးဇယားရဲ့ အဆင့် ၂၅ မှာ ရောက်ရှိနေပြီး နောက်တစ် ဆင့်တက်ဖို့ မဖြစ်မနေ အနိုင်ရရှိဖို့ အလွန် အရေးကြီးနေပါတယ်။ အန်တိုနီယို ကွန်တီရဲ့ အသင်းဟာ ပြီးခဲ့တဲ့ စီးရီးအေ ပွဲစဉ်မှာ ဂျူဗင်တပ်စ်ကို ၃-၀ နဲ့ ရှုံးနိမ့်ထားပေမယ့်လည်း ချန်ပီယံလိဂ် အိမ်ကွင်း ပွဲစဉ်တွေ မှာတော့ မာကျောတဲ့ အသင်း အဖြစ် ရှိနေဆဲပါ။
နာပိုလီက သူတို့ရဲ့ နောက်ဆုံး အိမ်ကွင်း ချန်ပီယံလိဂ် ပွဲ ၂၀ မှာ ၁ ပွဲသာ ရှုံးနိမ့်ထားပြီး ၁၂ ပွဲနိုင်၊ ၇ ပွဲ သရေကျထားပါ။ ဒါဟာ ၁၉၉၂-၁၉၉၃ ခုနှစ် နောက်ပိုင်း ချန်ပီယံလိဂ် အိမ်ကွင်း ပွဲ ၂၀ ကျော် ကစားထားတဲ့ အသင်းတွေထဲမှာ ရှုံးနိမ့်မှု ၁၂ ရာခိုင်နှုန်းသာ ရှိတာကြောင့် တတိယမြောက် အိမ်ကွင်း အမာကျောဆုံး အသင်း အဖြစ် ရပ်တည်နေပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
