နိုင်ငံတကာ ပေါင်ခြံ ကြွက်သား ဒဏ်ရာကြောင့် ရာသီကို အစောကြီး ကုန်ဆုံးခဲ့ရသလို ကမ္ဘာ့ဖလား နဲ့ပါ လွဲချော်ခဲ့ရတဲ့ ဆာ့ဂျ် ဂနာဘရီ ဟာ အခုအခါမှာတော့ ကွင်းထဲ ပြန်ဝင်နိုင်ဖို့ အတွက် အစွမ်းကုန် ကြိုးစားနေပါတယ်။
ဂနာဘရီဟာ ဒဏ်ရာကြောင့် ကမ္ဘာ့ဖလား အိပ်မက် ပျက်ပြယ်ခဲ့ရပြီး နောက်ပိုင်း ဘေယန်မြူးနစ် အသင်း အတွက် ပြန်လည် ဂိုးသွင်းပြီး အောင်ပွဲခံနိုင်မယ့်ရက်ကို လက်ချိုးရေတွက် မျှော်လင့်နေပါတယ်။ ပြီးခဲ့တဲ့ ဧပြီလတုန်းက ရရှိခဲ့တဲ့ ဒီဒဏ်ရာကြောင့် မြောက်အမေရိကမှာ ကျင်းပခဲ့တဲ့ ကမ္ဘာ့ဖလား ပြိုင်ပွဲမှာ ဂျာမနီ အသင်းရဲ့ လူစာရင်း ကနေ ဂနာဘရီ တစ်ယောက် ချန်လှပ်ခံခဲ့ရပါတယ်။ ဂျာမနီ အသင်း ဟာလည်း ၃၂ သင်း အဆင့် ရှုံးထွက်မှာ ပါရာဂွေး အသင်းကို ပင်နယ်တီ အဆုံးအဖြတ်နဲ့ ရှုံးပြီး အစောကြီး အိမ်ပြန်ခဲ့ရလို့ စိတ်ပျက်စရာ ခရီးစဉ် တစ်ခု ဖြစ်ခဲ့ရတာပါ။
လေ့ကျင့်ရေးကွင်းမှာ ဒဏ်ရာ ရရှိခဲ့ပြီးနောက် ဂနာဘရီဟာ “အချိန်အတော်ကြာ” အနားယူခဲ့ရတာကြောင့် ဘေယန်မြူးနစ် အသင်း ဘွန်ဒက်စ်လီဂါ ဖလား ဆွတ်ခူးနိုင်ခဲ့တဲ့ ရာသီပိတ် ပွဲစဉ်တွေကို လွဲချော်ခဲ့သလို၊ ချန်ပီယံလိဂ် ဆီမီးဖိုင်နယ်မှာ အနာဂတ် ချန်ပီယံ ပီအက်စ်ဂျီကို ရှုံးနိမ့်ခဲ့တဲ့ ပွဲတွေ ကိုလည်း အပြင်ကနေပဲ ကြည့်ခဲ့ရပါတယ်။
ဂနာဘရီဟာ ကလပ် ကမ္ဘာ့ဖလား ပြိုင်ပွဲအပြီး ၂၀၂၅-၂၆ ရာသီ ပြိုင်ပွဲစုံမှာ ဘေယန် အတွက် ၁၀ ဂိုးသွင်း၊ ၁၂ ဂိုး ဖန်တီးပေးနိုင်ခဲ့တာပါ။ နည်းပြ ဗင်းန်ဆင့် ကွန်ပနီရဲ့ အသင်းမှာ ဟယ်ရီကိန်း (၆၈ ကြိမ်)၊ မိုက်ကယ် အိုလီဆေး (၄၈ ကြိမ်) နဲ့ လူးဝစ် ဒီးယက်ဇ် (၄၅ ကြိမ်) တို့ပြီးရင် ဂိုးပါဝင် ပတ်သက်မှု အများဆုံး ကစားသမားလည်း ဖြစ်ပါတယ်။
ဒီတောင်ပံ ကစားသမားဟာ လာမယ့် သြဂုတ် ၂၂ ရက်နေ့မှာ ဒေါ့မန် အသင်းနဲ့ ကစားရမယ့် ဂျာမန် စူပါဖလား ရာသီ အဖွင့် ပွဲစဉ် မတိုင်ခင် ဒဏ်ရာ ပြန်လည် သက်သာလာဖို့ ကြိုးစားနေပြီး ဂိုးတွေ ပြန်သွင်းနိုင်ဖို့ အတွက် တကယ့်ကို ဆာလောင်နေတာပါ။ ဒဏ်ရာ တိုးတက်မှု အခြေအနေနဲ့ ပတ်သက်ပြီး ဘေယန်မြူးနစ် အသင်းရဲ့ ဝဘ်ဆိုက်နဲ့ အင်တာဗျူးမှာ ဂနာဘရီက အခုလို ပြောကြားခဲ့ပါတယ်။
“အရမ်းကောင်းပါတယ်။ လေ့ကျင့်ရေးဆင်းတိုင်းမှာ ပိုပိုကောင်းလာတာကို ကိုယ်တိုင် ခံစားရလို့ တကယ့်ကို ပျော်စရာကောင်းပါတယ်။ ဒါပေမယ့် အသင်းနဲ့ အတူ လေ့ကျင့်ခန်းဆင်းရတာက ပိုပြီးတော့ ပျော်ဖို့ကောင်းတာ ကိုတော့ ဝန်ခံရမှာပါ။ အသင်းဖော်တွေကို လွမ်းတယ်၊ အသင်းလိုက် လေ့ကျင့်ခန်းတွေနဲ့ ဘောလုံး ပါဝင်လာတဲ့ အချိန်က ပြင်းထန်တဲ့ အလေ့အကျင့်တွေကို လွမ်းပါတယ်။ ဒဏ်ရာ ပြန်လည် ထူထောင်ရေး မှာတော့ အဓိက ကြံ့ခိုင်မှုပိုင်း ကိုပဲ အသားပေး လုပ်ရတာ ဆိုတော့ လူတိုင်း သိတဲ့အတိုင်း သိပ်တော့ မပျော်စရာကြီး မဟုတ်ဘူးပေါ့ဗျာ။”
“ဒါပေမယ့် ကွင်းထဲ ပြန်ကစားနိုင်ဖို့ဆိုရင် ဒါက မဖြစ်မနေ လိုအပ်တာလေ။ ဒီလို အချိန်တွေက တော်တော်လေး ရှည်လျားပြီး ထပ်တလဲလဲ လုပ်ရတဲ့ လေ့ကျင့်ခန်းတွေချည်းပဲမို့ စိန်ခေါ်မှုတစ်ခုလိုပါပဲ။ ဒါပေမယ့် ‘မင်းဒါတွေ လုပ်နေတာ ကွင်းထဲ ပြန်ကစားနိုင်ဖို့အတွက်ပဲ’ ဆိုပြီး ကိုယ့်ကိုယ်ကိုယ် အမြဲ သတိပေးပါတယ်။ ကျွန်တော် ဘောလုံး ပြန်ကစားရမယ့် အချိန်နဲ့ စိတ်ရှင်းရှင်းလင်းလင်းနဲ့ ကစားနိုင်မယ့် အချိန် ကိုပဲ မျှော်လင့်နေပါတယ်။”
“ဒဏ်ရာရခါစ ပထမဆုံး ၇ ပတ်အတွင်းမှာ ဘာမှ သိပ်မလုပ်နိုင်ခဲ့ပါဘူး။ အဲဒီအချိန်တုန်းက ဘောလုံးကို အလွမ်းဆုံးပါပဲ။ ဒါကြောင့် ကွင်းထဲ ပြန်ဝင်၊ ဂိုးတွေ သွင်းပြီး ပရိသတ်တွေနဲ့ အတူ အောင်ပွဲခံချင်လှပြီ။ ဒါက တိုက်စစ်မှူး တစ်ယောက် အတွက် အမြဲတမ်း စိတ်လှုပ်ရှားစရာ အကောင်းဆုံး အခိုက်အတန့်ပဲလေ” လို့ ဆိုသွားခဲ့ပါတယ်။
ဘေယန်မြူးနစ် အသင်းဟာ စူပါဖလား ပွဲစဉ်အပြီး သြဂုတ် ၂၈ ရက်နေ့ မှာတော့ ဘွန်ဒက်စ်လီဂါ ရာသီအဖွင့် ပွဲစဉ် အဖြစ် စတုဂတ် အသင်းကို အိမ်ကွင်းမှာ လက်ခံကစားရမှာ ဖြစ်ပြီး၊ အဲဒီနောက် ဂျာမန် ပိုကယ်ဖလား ပထမအဆင့် ပွဲစဉ် အဖြစ် ဒုတိယတန်းက အော့စ်နာဘရုခ် အသင်းနဲ့ သွားရောက် ရင်ဆိုင်ရမှာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
