ဂျာမနီ ဘော့စတွန်ကွင်းမှာ ကစားခဲ့တဲ့ ကမ္ဘာ့ဖလား အုပ်စု (L) ပွဲစဉ်မှာ အင်္ဂလန် အသင်းဟာ ဂါနာ အသင်းရဲ့ ခံစစ်တံတိုင်းကို မထိုးဖောက်နိုင်တာကြောင့် ဂိုးမရှိ သရေရလဒ်နဲ့ပဲ ကျေနပ်ခဲ့ရပါတယ်။ အင်္ဂလန်က အုပ်စု ပထမနေရာမှာ ဆက်ရှိနေပေမယ့် ရှုံးထွက်အဆင့်ကို တက်ရောက်နိုင်ဖို့ သေချာအောင် ထပ်မံ စောင့်ဆိုင်းရဦးမှာ ဖြစ်ပါတယ်။
ဒီပွဲမှာ အင်္ဂလန် အသင်း အနေနဲ့ နိုင်ပွဲရရင် နောက်တစ်ဆင့်တက်ဖို့ သေချာမှာ ဖြစ်ပေမယ့် အခုတော့ နောက်ပွဲစဉ် ဖြစ်တဲ့ ပနားမားနဲ့ ပွဲမှာ မရှုံးအောင် ကစားရတော့မယ့် အခြေအနေ ဖြစ်သွားပါတယ်။ ပွဲစကတည်းက အင်္ဂလန်အသင်းက ဘောလုံးပိုင်ဆိုင်မှု အသာစီးနဲ့ တိုက်စစ်ဆင်ကစားခဲ့ပေမယ့် ဂါနာ ဂိုးသမား ဘင်ဂျမင် အာဆာရေးကို အမှန်တကယ် ခြိမ်းခြောက်နိုင်ခြင်း မရှိခဲ့ပါဘူး။ ပွဲချိန် ၁၄ မိနစ်မှာ ဒီကလန် ရိုက်စ် ကန်လိုက်တဲ့ အဝေးကန်ချက် ပြင်းပြင်းဟာ ဂိုးဘားပေါ် ကျော်သွားခဲ့ပြီး ပထမပိုင်းပြီးခါနီးအထိ ဒီလိုပုံစံအတိုင်းပဲ ဆက်သွားခဲ့ပါတယ်။
အင်္ဂလန်တို့ တိုက်စစ်ဆင်ရာမှာ ဂျူ့ဒ် ဘယ်လင်ဟမ်ရဲ့ ကန်ချက်ကို သောမတ်စ် ပါတေးက ဖျက်ထုတ်နိုင်ခဲ့သလို၊ နိုနီ မာဒူအေခေရဲ့ ဖြတ်တင်ဘောကနေ ဒီကလန် ရိုက်စ် ခေါင်းတိုက်တာလည်း ဂိုးဘားပေါ် ကျော်သွားခဲ့ပါတယ်။ ဒါ့အပြင် ဟယ်ရီကိန်းရဲ့ ဂိုးဧရိယာအတွင်း ကန်ချက် ကိုလည်း ဂါနာ နောက်ခံလူ ဂျိုးနတ်စ် အာဂျေတေက လမ်းကြောင်းပြောင်း ဖျက်ထုတ်နိုင်ခဲ့ပါတယ်။
စိတ်ဝင်စားစရာ မှတ်တမ်းတစ်ခု ကတော့ ၂၀၂၂ ကမ္ဘာ့ဖလားတုန်းက ခရိုအေးရှားနဲ့ ဘယ်လ်ဂျီယံ ပွဲပြီးရင် ဒီပွဲဟာ နှစ်သင်းစလုံး ပထမပိုင်းမှာ ဂိုးပေါက်တည့်မှု တစ်ကြိမ်မှ မရှိခဲ့တဲ့ ပထမဆုံး ကမ္ဘာ့ဖလား ပွဲစဉ် ဖြစ်လာခဲ့တာပါ။ ဒါပေမယ့် ပွဲချိန် မိနစ် ၆၀ နီးပါး မှာတော့ အန်သိုနီ ဂေါ်ဒွန်ရဲ့ အားပျော့တဲ့ ကန်ချက်နဲ့အတူ အင်္ဂလန်တို့ ပထမဆုံး ဂိုးပေါက်တည့်မှု စတင်ရရှိခဲ့ပါတယ်။
အဲဒီနောက် ဟယ်ရီကိန်းရဲ့ ဂိုးဧရိယာ အစပ်က ကန်ချက် ကိုလည်း ဂါနာ ဂိုးသမား အာဆာရေးက ကာကွယ်သွားနိုင်ခဲ့သလို၊ လူစားဝင်လာတဲ့ ဘူကာယို ဆာကာရဲ့ ခေါင်းတိုက်ချက် ကလည်း ဂိုးဘားတန်းပေါ် ကျော်သွားခဲ့ပါတယ်။ ဒီပွဲမှာ အင်္ဂလန် နည်းပြ သောမတ်စ် တူချယ်ဟာ မော်ဂန် ရော်ဂျာစ်နဲ့ အီဘာရီချီ အီဇီ တို့ကို သူတို့ရဲ့ ပထမဆုံး ကမ္ဘာ့ဖလား ပွဲဦးထွက် အဖြစ် လူစားလဲ ထည့်သွင်းခဲ့ပါသေးတယ်။
တစ်ဖက် မှာလည်း ဂါနာ အသင်းဟာ တန်ပြန်တိုက်စစ်နဲ့ ခြိမ်းခြောက်နိုင်ခဲ့ပြီး ပွဲချိန် အနှောင်းပိုင်းမှာ အင်္ဂလန် နောက်ခံလူ အက်ဇ်ရီ ကွန်ဆာသာ အချိန်မီ မဖြတ်ထုတ်နိုင်ခဲ့ရင် ဂါနာ တိုက်စစ်မှူး ပရင့်စ် အာဒူ အနေနဲ့ အင်္ဂလန် ဂိုးသမား ဂျော်ဒန် ပစ်ခ်ဖို့ဒ်နဲ့ တစ်ဦးချင်း ရင်ဆိုင်ရမယ့် အခွင့်အရေး ရသွားနိုင်ပါတယ်။
ပွဲပြီးခါနီး မိနစ်ပိုင်းတွေ မှာတော့ အင်္ဂလန်တို့ အနိုင်ဂိုး ရဖို့ ပိုနီးစပ်ခဲ့ပါတယ်။ ဆာကာရဲ့ ကန်ချက်ကို ဂါနာ ဂိုးသမား လက်စွမ်းပြ ပုတ်ထုတ်နိုင်ခဲ့သလို၊ နီကို အိုရွိုင်လီက ရိစ် ဂျိမ်းစ်ရဲ့ ဖြတ်တင်ဘောကို ခေါင်းတိုက်ရာမှာ ဂိုးတိုင်ထိပြီး ပြန်ထွက်လာခဲ့ပါတယ်။ အဲဒီ ပြန်ထွက်လာတဲ့ ဘောလုံးက ဟယ်ရီကိန်းဆီ ကျရောက်ခဲ့ပေမယ့် ဂိုးပေါက်နဲ့ ၆ ကိုက် အကွာ ကနေ ဘယ်လိုနည်းနဲ့ အပေါ် ထောင်ကန်လိုက်လဲ မသိရလောက်အောင်ပဲ လွဲချော်သွားခဲ့လို့ နှစ်သင်းစလုံး သရေရလဒ်နဲ့သာ ပွဲပြီးဆုံးခဲ့ရပါတယ်။
ပထမပွဲစဉ်တုန်းက ခရိုအေးရှားကို ဂိုးပြတ် အနိုင်ရခဲ့တာကြောင့် ပရိသတ် အများစုက ကမ္ဘာ့အဆင့် ၆၅ ရှိတဲ့ (နောက်ဆုံး နှစ် ၃၀ အတွင်း အင်္ဂလန်ရင်ဆိုင်ခဲ့ရသမျှ ကမ္ဘာ့ဖလား ပြိုင်ပွဲဝင် အသင်းတွေထဲမှာ အဆင့်အနိမ့်ဆုံး ဖြစ်တဲ့) ဂါနာ အသင်းကို အင်္ဂလန်တို့ အလွယ်တကူ ဂိုးပြတ်သွင်းလိမ့်မယ်လို့ ခန့်မှန်းခဲ့ကြပါတယ်။
ဒါပေမယ့် တူချယ်ရဲ့ အသင်းဟာ ပထမပိုင်းမှာ တိုက်စစ်ပိုင်း ကစားကွက်ဖော်ဖို့ တော်တော်လေး ရုန်းကန်ခဲ့ရပါတယ်။ အင်္ဂလန်အသင်း အနေနဲ့ ပြိုင်ဘက်ရဲ့ Final third ထဲမှာ ပေးပို့မှု အောင်မြင်တာ ၁၀၄ ကြိမ် အထိ ရှိခဲ့ပေမယ့် ပထမပိုင်းမှာ ဂိုးပေါက်တည့်မှု တစ်ကြိမ်မှ မရခဲ့တာဟာ ၁၉၆၆ ခုနှစ်နောက်ပိုင်း ကမ္ဘာ့ဖလား မှတ်တမ်းတွေအရ အဆိုးရွားဆုံး စွမ်းဆောင်ရည် ဖြစ်ခဲ့ပါတယ်။
ဒါပေမယ့်လည်း နည်းပြ တူချယ် အတွက် ကျေနပ်စရာ တစ်ခု ကတော့ ဂျွန် စတုန်းစ်ရဲ့ နေရာမှာ ဝင်ကစားခဲ့တဲ့ နောက်ခံလူ မာ့ခ် ဂူဟီရဲ့ ခြေစွမ်းပဲ ဖြစ်ပါတယ်။ မန်စီးတီး နောက်ခံလူဟောင်း ဖြစ်တဲ့ ဂူဟီဟာ ဒီပွဲမှာ ဂါနာ အသင်း ဆီကနေ ပြစ်ဒဏ်ဘော ၇ ကြိမ်အထိ ရအောင် ယူပေးနိုင်ခဲ့ပြီး ဒါဟာလည်း ၁၉၆၆ နောက်ပိုင်း ကမ္ဘာ့ဖလား သမိုင်းမှာ နောက်ခံလူ တစ်ယောက် အနေနဲ့ ပြစ်ဒဏ်ဘော အများဆုံး ရရှိတဲ့ စံချိန်နဲ့ တူညီသွားခဲ့ပါတယ်။
ဒါတင်မကသေးဘဲ သူဟာ ဘောလုံး ပေးပို့မှု ၁၂၆ ကြိမ်အထိ အောင်မြင်အောင် ပေးနိုင်ခဲ့လို့ အင်္ဂလန် ကမ္ဘာ့ဖလား သမိုင်းတစ်လျှောက် ဘောလုံးပေးပို့မှု အများဆုံး အင်္ဂလန် ကစားသမား ဖြစ်လာခဲ့ပါတယ်။ ပွဲပြီးခါနီးမှာလည်း သူ့ရဲ့ ခေါင်းတိုက်ချက်ကို ဂါနာ နောက်ခံလူက ဂိုးစည်းပေါ်ကနေ ဖျက်ထုတ်သွားခဲ့လို့သာ ဂိုးမရခဲ့တာ ဖြစ်ပါတယ်။
ဒီပွဲစဉ် ကနေ နည်းပြ တူချယ် အနေနဲ့ သင်ခန်းစာယူစရာတွေ အများကြီး ရှိခဲ့ပြီး အဓိက ကတော့ တိုက်စစ်ပိုင်းကို ဘယ်လို မြှင့်တင်မလဲ ဆိုတာပါပဲ။ အင်္ဂလန် အသင်းဟာ ဒီပွဲမှာ ဂိုးပေါက်ကန်ချက် ၁၉ ကြိမ်အထိ ရှိခဲ့ပေမယ့် ဂိုးမရခဲ့တာဟာ ၂၀၀၂ ကမ္ဘာ့ဖလားတုန်းက နိုင်ဂျီးရီးယားနဲ့ပွဲ (၂၅ ကြိမ် ကန်ခဲ့ပြီး ဂိုးမရခဲ့တဲ့ပွဲ) ပြီးရင် အဆိုးရွားဆုံး ဖြစ်ခဲ့ပြီး မျှော်မှန်းဂိုး (xG) စုစုပေါင်း ၁.၂၈ ရှိခဲ့ပေမယ့် သရေရလဒ်နဲ့သာ အဆုံးသတ်ခဲ့ရတာ ဖြစ်ပါတယ်။
●●●
နောက်ထပ်သတင်းများအတွက် ကျွနိုပ်တို့ ဘလော့အား ဝင်ကြည့်ပါ ဘောလုံး STORIES & ODDS
အားကစားနှင့် လောင်းကစား နောက်ဆုံးသတင်းများအား အမြဲသိရှိနေမည်
ဆိုရှယ်မီဒီယာတွင် ကျွနိုပ်တို့အား followမည် ဖေစ့်ဘုတ် , X and အင်စတာဂရမ်
